ghè pasà düimila àgn da cönt ti sè nasü.
Tücc i’àgn nüi rigurdùma cùl mumént,
fùma tönti prumösi, pöi mantignùma mai un bél gnént.
Rivaa la fèsta, pinsùma püsè a disfa giü i rigài,
da ti’n rigurdùma già piü, pròpi un bèl esèmpi par i nöscc matài.
Numa mösa, sicüür, ma un po’ par abitüdin, un po’ par tradizión.
Pinsùma püsè a bütaa i gömbi suta’l tàvul, a mangiaa al panatón.
Fuma l’ albero, pin ad bàli e luci culùrai, ca smöja na discùtéca.
E’l pràsèpi, cùm i pastór, al mùgn, al bö, l’asnin, la capana e la cùmèta ?
Cùs ’importa. Tücc i’àgn minùma i matài sü al Mèsma, vöga cùl di frài.
Ma sarés mia pusè bél fàgan vün cùm i nòsti mögn, par i nöscc matai ?
Cùm al naas in sü, spirùma önca, che d’un mumént e l’aut s’büta drè a paliscaa.
Che bilöza, che atmusféra, propi cùla giusta. Insi la fèsta la sarés cùmplitaa.
Un méés prüma cumanciùma a giraa, cumè lucoogn intórn da chi e da là.
Giruma par butéghi, mercatini, centri comèrciali e supermarcà.
Ublighè a spénda sold, " l’è duma un présént ", ublighè a rigalaa.
Al Nadàl, cara la mé sgént l’è mia dùmà fa fèsta. Nadàl l’è önca prigaa.
Intönt rivùma la vigilia, strèc, i péi sgùnfi e’n fà mal la schèna,
e ùma gnönca truvà mez’ora’t témp, par na sü in gésa fa la nuvéna.
Na sü in gésa par prapàraan a ricèva, insì cùm as cunvögn,
chi l’è gnü chì a nà-sa e a murii par nüi, par al nóst bögn.
Ma’v rigùrdè già piü cùl che i nöscc vécc n’ön sénpra mùstrà.
Ghè mia da naa’ndré pöi tönt, l’è sé rivaa la mità dal sécul pasà.
Car Bambìn pardónan. Pardónan car Signór.
Sumàn pròpi di povr’òman. Sumàn di pòvar picàtór.